Norðurland Vestra
Stuðningsumhverfi nýsköpunar á Norðurlandi Vestra:
Ráðgjöf
Samband sveitarfélaga á Norðurlandi vestra (SSNV) veita ráðgjöf til frumkvöðla og sprotafyrirtæki á Norðurlandi vestra. Þessi ráðgjöf er í boði hjá öllum landshlutasamtökum í öllum landshlutum skv. samningi við Byggðastofnun. Ráðgjöfin er gjaldfrjáls á fyrstu stigum (allt að 10 tíma ráðgjöf).
Samfélagið
Eimur er klasi sem hefur það að markmiði að bæta nýtingu auðlinda á Norðurlandi með verðmætasköpun, sjálfbærni og nýsköpun að leiðarljósi. Eimur miðar að því að leiða saman fólk og fyrirtæki til samstarfs um tilraunir, rannsóknir og þróunarverkefni á sviði orku-, auðlinda-, og loftslagsmála, meðal annars með öflun alþjóðlegs fjármagns.
Norðanátt er hreyfiafl nýsköpunar á Norðurlandi sem miðar að því að auka fjárfestingar á svæðinu og skapa kraftmikið umhverfi fyrir frumkvöðla og fyrirtæki sem vinna að nýsköpun með áherslu á loftslagsmál og hringrásarhagkerfið. Frumkvöðlar og sprotafyrirtæki sem vinna að verkefnum á þeim sviðum geta leitað til Norðanáttar og fengið ráðgjöf. Norðanátt rekur m.a. viðskiptahraðal, hugmyndasamkeppni og fjárfestahátíð á Norðurlandi.
Hraðlar
Startup Stormur er sjö vikna hraðall fyrir græn verkefni á Norðurlandi, þar sem þátttakendur fá tækifæri til að efla sig og sín fyrirtæki og vaxa með vindinn í bakið. Hraðalinn er rekinn af Norðanátt og er ætlaður frumkvöðlum, nýjum fyrirtækjum og nýsköpunarverkefnum innan rótgróinna fyrirtækja á Norðurlandi sem eru komin af hugmyndastigi. Hraðalinn fer að mestu leyti fram á netinu en teymin hittast jafnframt þrisvar sinnum á vinnustofum.
Setur
Textílmiðstöð Íslands er rannsóknarsetur og textíl lab með rými sem er útbúið stafrænum tækjum sem tengjast textílvinnslu, eins og vefnaði, prjóni, þæfingu og útsaumi. Þegar hefur verið fjárfest í stafrænum vefstól, prjónavél og útsaumsvél, nálaþæfingarvél, auk leiserskera og vínyl prentara og skera. TextílLab býður upp á aðstöðu til nýsköpunar og þróunar á textíl í tengslum við sjálfbærni og hringrásarhagkerfið. TextílLab er opið öllum og ekki þarf sérstaka reynslu eða fullkláraða verkefnahugmynd til að nýta sér aðstöðuna.
Vörusmiðjan er vottað vinnslurými fyrir smáframleiðendur staðsett á Skagaströnd. Vörusmiðjan hentar til þróunar, nýsköpunar og framleiðslu á náttúrulegum mat- og heilsuvörum.
Fab Lab
Fab Lab er stafræn smiðja með það að markmiði að efla nýsköpun og tæknilæsi í samfélaginu. Þar er hægt að þróa nýsköpunarhugmyndir meðal almennings, innan menntastofnana og í atvinnulífinu.
Fab Lab er stafræn smiðja með það að markmiði að efla nýsköpun og tæknilæsi í samfélaginu. Þar er hægt að þróa nýsköpunarhugmyndir meðal almennings, innan menntastofnana og í atvinnulífinu. Sterkt tengslanet er meðal smiðja innanlands sem utan. Ýmis búnaður er til staðar m.a. geislaskerar, þrívíddarprentarar, stafrænir fræsarar, vínylskerar, saumavélar, rafeindasvæði og aðstaða til mótagerðar.
Styrkir
Uppbyggingasjóður styrkir m.a. nýsköpunarverkefni á Norðurlandi vestra í samræmi við samning um sóknaráætlun landshlutans. Að jafnaði getur styrkur numið allt að 50% af heildarkostnaði verkefnis, en þó að hámarki 20% af heildarfjármagni sem er til úthlutunar í hvorum flokki fyrir sig.
