Hraðlar
Yfirlit yfir nýsköpunar- og viðskiptahraðla á Íslandi. Hraðlarnir eru á mismunandi stigum og mismunandi sviðum, eitthvað fyrir alla.
🇮🇸 Innlendir hraðlar
Hraðlar eru góðir byrjunarstaðir og stökkpallur fyrir viðskiptahugmyndir. Með því að taka þátt í hröðlum hljóta þátttakendur oft ýmiss konar fræðslu, reynslu og ráðgjöf. Hraðlarnir eru á mismunandi stigum, á mismunandi stöðum um landið og sumir eru einungis fyrir ákveðinn geira / svið. Hér finnur þú alla helstu viðskiptahraðlana á Íslandi:
Norðansprotinn er nýsköpunarkeppni fyrir hugmyndir á fyrstu stigum á Norðurlandi. Einfalt umsóknarferli og góður fyrsti inngangur fyrir frumkvöðla sem vilja þróa hugmynd áfram með stuðningi atvinnuráðgjafa.
AWE Iceland (Academy for Woman Entrepreneurs in Iceland) er samstarfsverkefni Háskóla Íslands (HÍ) og sendiráðs Bandaríkjanna á Íslandi sem hefur það markmið að styðja konur við að þróa viðskiptahugmyndir. Frumkvöðlahraðalinn er gjaldfrjáls og er byggður á netnámskeiði Dreambuilder og vinnustofum sem HÍ, í samvinnu við FKA, heldur utan um, til að styðja við frumkvöðlastarf kvenna. Þátttakendur sem geta verið einstaklingar eða teymi, njóta góðs af leiðsögn, tengslamyndun og hagnýtum ráðleggingum um stofnun fyrirtækja, markaðssetningu og fleira. Í lok hraðalsins eru veitt verðlaun fyrir bestu viðskiptaáætlunina, bestu kynninguna og mestu framfarirnar.
Gulleggið er frumkvöðlakeppni á hugmyndastigi sem haldin er af KLAK – Icelandic Startups. Gulleggið hefst með opnum Masterclass, þar sem markmiðið er að þróa hugmynd og búa til kynningu sem gerir þér kleift að taka næsta skref. 10 teymi eru svo valin inn í lokakeppni Gulleggsins þar sem eitt teymi vinnur 2.000.000 kr. (heildarpeningaverðlaun eru 3.000.000 kr.). Gulleggið hefur verið stökkpallur fyrir fjölmörg íslensk fyrirtæki eins og Controlant, Meniga, PayAnalytics, Genki og Taktikal. Gulleggið er kjörinn vettvangur til að komast inn í nýsköpunarumhverfið og er hægt að taka þátt án þess að vera með hugmynd.
__2026-08-28%2Flogo%2Fdrift_ea_.jpg?alt=media&token=84eddaf4-bf09-4fd8-a854-f430cffdadd9 "Hlunnur (Drift EA)")
Hlunnurinn er vettvangur innan Driftar EA á Akureyri þar sem verkefni fá heildstætt utanumhald í allt að 12 mánuði: skrifstofurými, vikulega einstaklingsþjálfun, vinnustofur um fjármögnun, lögfræði, markaðssetningu og vöruþróun, aðstoð við fjármögnun og öflugt tengslanet — í völdum tilfellum aðgang að fjárfestingarsjóði. Ekki er sótt um beint; aðeins verkefni sem ljúka Slipptökunni komast í Hlunninn.
Hringiða er viðskiptahraðall í umsjón KLAK með áherslu á sjálfbærni og hefur það að markmiði að draga fram, efla og styðja við nýsköpunarverkefni á frumstigi. Tíu sprotaverkefni á fyrstu stigum eru valin inn í hraðlinn og taka þátt í skipulögðum vinnustofum og fá handleiðslu úr hópi mentora frá KLAK VMS. Hlutverk Hringiðu er að stuðla að því að á Íslandi rísi öflug fyrirtæki sem byggja á hugmyndafræði hringrásarhagkerfisins, skapi verðmæti og skili árangri í umhverfis- og loftslagsmálum.
Fimm vikna viðskiptahraðall sem er sérsniðinn að þörfum sprotafyrirtækja í heilsutækni. Markmið hraðalsins er að efla íslenskt heilbrigðiskerfi með því að veita þátttakendum aðgang að sérhæfðri fræðslu, leiðsögn frá sérfræðingum og sterkum tengslum við fjárfesta og lykilaðila.
Prótó er 4. vikna ferli á netinu þar sem þú lætur þína hugmynd verða að veruleika. Ekki er nauðsynlegt að vera með hugmynd fyrirfram því fyrsta vikan fer alfarið í að velja og móta hugmynd. Hægt að skrá sig á proto.is og vera hluti af hvetjandi samfélagi þar sem þið deilið reynslu og náið markmiðum ykkar saman.
Slipptakan er vettvangur fyrir frumkvöðla sem vilja taka næsta skref með verkefnið sitt þar sem þátttakendur fá rými til að skerpa og þróa hugmynd sín áfram. Slipptakan felur í sér þrjár vinnustofur, leiðsögn við þróun viðskiptalíkana og áætlana, ásamt faglegri endurgjöf frá sérfræðingum og jafningjum. Verkefnin sem taka þátt fá einnig persónulega ráðgjöf og tengsl við öflugt frumkvöðlasamfélag. Aðeins þau sem ljúka Slipptökunni geta haldið áfram í Hlunni árslöngu prógrami Drift EA.
Snjallræði er 16 vikna vaxtarrými (e. incubator) sem styður við öflug teymi sem brenna fyrir lausnum á áskorunum samtímans og styðja við heimsmarkmið Sameinuðu þjóðanna. Það geta verið lausnir sem snúa að heilbrigðisþjónustu, velferðartækni, bættu menntakerfi og jafnréttismálum, svo dæmi séu tekin. Vaxtarrýmið er samstarf HÍ, HR, HA og MITdesignX, og er þungamiðja þess vinnustofur með sérfræðingum frá MIT. Þátttakendur fá aðgang að fræðslu og þjálfun á sviði samfélagsmála og nýsköpunar og fundi með reyndum mentorum.
Startup Landið er nýsköpunarhraðall fyrir frumkvöðla á landsbyggðinni. Að skipulagningu standa samtök landshluta hringinn í kringum landið en markmiðið er að skapa vettvang fyrir frumkvöðla og áhugafólk um nýsköpun sem vill láta að sér kveða. Valin verða teymi til þáttöku sem munu frá fræðslu og ráðgjöf til þess að þróa hugmynd sína áfram í stuðningsumhverfi. Vegleg verðlaun eru fyrir bestu hugmyndirnar.
Tíu teymi eru valin í Startup SuperNova sem hefst á öflugu Masterclass námskeiði. Áhersla er lögð á fyrirtæki sem stefna á að skala hratt á alþjóðamarkaði. Við tekur sex vikna viðskiptahraðall, á vegum KLAK - Icelandic Startups, þar sem þátttakendur fá handleiðslu úr hópi mentora frá KLAK VMS. Startup SuperNova lýkur svo með fjárfestadegi þar sem teymin kynna verkefni sín.
🌎 Erlendir hraðlar
Mikið magn af viðskiptahröðlum má finna erlendis, en hér verður stikklað á örfáum frægum og hröðlum sem eru í samstarfi við íslenska stuðningsaðila:
Antler er alþjóðlegur frumstigsfjárfestir sem styður frumkvöðla og fyrirtæki frá allra fyrstu skrefum. Antler Nordics starfar í Stokkhólmi, Osló, Kaupmannahöfn og Helsinki og tekur bæði við einstaklingum og teymum. Þátttakendur fá einstaklingsmiðaðan stuðning, aðgang að öflugu tengslaneti og aðstoð við að þróa fyrirtækið og sækja fjármagn. Umsóknir á Norðurlöndum eru opnar allt árið. Staðlaða fjárfesting Antler Nordics er €500.000, þar af €200.000 við fjárfestingarákvörðun og allt að €300.000 til viðbótar í næstu fjármögnunarlotu.
Hraðall í Malmö Svíþjóð fyrir fyrirtæki sem eru að gera sig tilbúin fyrir seed fjárfestingu. Á hverju ári er fjárfest 50 þúsund evrum í 10 mismunandi nýsköpunarfyrirtækjum og stendur prógrammið yfir í 3 mánuði. Hefur verið kosinn besti hraðallinn í Svíþjóð. Hafa áhuga á að fá umsóknir frá íslenskum fyrirtækjum.
Frumkvöðlasjóður UArctic er hugsaður fyrir sprotafyrirtæki sem á einn eða annan hátt bjóða upp á vöru eða þjónustu sem hefur það að markmiði að styðja við samfélög/umhverfi norðurslóða og geta sýnt fram á jákvæð og áþreifanleg áhrif á Norðurskautið.
Techstars stendur fyrir hröðlum sem eru haldnir víðsvegar um heim, í Ameríku, Evrópu, Asíu og Afríku. Hraðlarnir eru 3 mánaða prógram og þau nýsköpunarfyrirtæki sem komast að fá fjárfestingu upp á $220 þús., $20 þús. eru gegn 5% hlut og $200 þús. eru fjárfest með uncapped MFN SAFE. Einstaklings mentora fundir, aðgangur að Techstar tengslanetinu og aðstoð við vörumarkaðshæfni o.fl. Íslensk fyrirtæki hafa tekið þátt í Techstars Seattle.
TINC viðskiptahraðall í Kísildalnum sem er hluti af Nordic Innovation House í samstarfi við KLAK. Hraðallinn er fyrir nýsköpunarfyrirtæki frá Norðurlöndunum sem eru að stefna á alþjóðamarkað. Stendur yfir í 6 vikur og er haldið tvisvar á ári, á vorin og haustin. Allt að tvö íslensk fyrirtæki komast að í hvert sinn. Vinnustofur, vikulegir mentora fundir, "pitch" þjálfun og frábært tækifæri fyrir tengslamyndun við fyrirtæki í Kísildalnum.
Visa Innovation Program Europe – Nordics & Baltics er hraðall og samstarfsvettvangur fyrir fintech-fyrirtæki með markaðsprófaðar lausnir. Prógrammið er rekið af Tenity í samstarfi við Visa og leggur áherslu á pilot- og Proof of Concept verkefni með Visa og öðrum samstarfsaðilum. Þátttakendur fá aðgang að ráðgjöf, vinnustofum, fjárfestum og tengslaneti. Ísland er eitt af þátttökulöndunum. Enginn hlutur er tekinn í fyrirtækjunum og ekkert þátttökugjald er innheimt.
Y-Combinator (YC) er einn af virtustu viðskiptahröðlum heims, og hefur komið af stað yfir 5.000 fyrirtækjum síðan 2005, þar á meðal risum eins og Airbnb, Dropbox og Stripe. Hraðalinn sem er staðsettur í Silicon Valley er haldinn fjórum sinnum á ári, þrjá mánuði í senn. Þau teymi sem eru valin fá frumfjárfestingu frá YC, leiðsögn frá sérfræðingum í greininni og gott tengslanet. Prógrammið endar svo á kynningardegi, þar sem fyrirtækin kynna sig fyrir vel völdum hópi fjárfesta.
