Norðurland Eystra
Stuðningsumhverfi nýsköpunar á Norðurlandi Eystra:
Ráðgjöf
Áttavitinn er ráðgjafaþjónusta Drift EA fyrir þau sem eru með hugmynd en vita ekkert hvert á að leita. Hægt er að fá ókeypis 20 mínútna ráðgjöf hjá þjálfurum Drift EA þar sem þú kynnir hugmyndina þína og færð faglega endurgjöf og ráðleggingar.
Samtök sveitarfélaga og atvinnuþróunar á Norðurlandi eystra (SSNE) veita ráðgjöf til frumkvöðla og sprotafyrirtæki á Norðurlandi eystra. Þessi ráðgjöf er í boði hjá öllum landshlutasamtökum í öllum landshlutum skv. samningi við Byggðastofnun. Ráðgjöfin er gjaldfrjáls á fyrstu stigum.
Samfélagið
Eimur er klasi sem hefur það að markmiði að bæta nýtingu auðlinda á Norðurlandi með verðmætasköpun, sjálfbærni og nýsköpun að leiðarljósi. Eimur miðar að því að leiða saman fólk og fyrirtæki til samstarfs um tilraunir, rannsóknir og þróunarverkefni á sviði orku-, auðlinda-, og loftslagsmála, meðal annars með öflun alþjóðlegs fjármagns.
Norðanátt er hreyfiafl nýsköpunar á Norðurlandi sem miðar að því að auka fjárfestingar á svæðinu og skapa kraftmikið umhverfi fyrir frumkvöðla og fyrirtæki sem vinna að nýsköpun með áherslu á loftslagsmál og hringrásarhagkerfið. Frumkvöðlar og sprotafyrirtæki sem vinna að verkefnum á þeim sviðum geta leitað til Norðanáttar og fengið ráðgjöf. Norðanátt rekur m.a. viðskiptahraðal, hugmyndasamkeppni og fjárfestahátíð á Norðurlandi.
„Nýsköpun💡Háskólinn á Akureyri“ er Facebook hópur og umræðuvettvangur fyrir frumkvöðla er tengjast Háskólanum á Akureyri. Þú getur leitað að spurningum og svörum, sem og spurt aðra spurninga tengt nýsköpun á svæðinu.
STÉTTIN er samfélag stofnana, fyrirtækja og einstaklinga á Húsavík sem starfa við nýsköpun, rannsóknir, þróun og þekkingarstarfsemi. Á staðnum er m.a. Hraðið nýsköpunarsetur og FabLab smiðja.
Hraðlar
Slipptakan er vettvangur fyrir frumkvöðla sem vilja taka næsta skref með verkefnið sitt þar sem þátttakendur fá rými til að skerpa og þróa hugmynd sín áfram. Slipptakan felur í sér þrjár vinnustofur, leiðsögn við þróun viðskiptalíkana og áætlana, ásamt faglegri endurgjöf frá sérfræðingum og jafningjum. Verkefnin sem taka þátt fá einnig persónulega ráðgjöf og tengsl við öflugt frumkvöðlasamfélag. Aðeins þau sem ljúka Slipptökunni geta haldið áfram í Hlunni árslöngu prógrami Drift EA.
Setur
Hraðið er miðstöð nýsköpunar og heimavöllur frumkvöðla, stofnana og fyrirtækja sem vinna að nýsköpun með einum eða öðrum hætti. Í Hraðinu er hvetjandi starfsumhverfi og fjöldi fundarrýma fyrir teymisvinnu, hugarflugsfundi, fjarfundi og upptökur. Fullbúin Fab Lab smiðja er á staðnum og notaleg kaffiaðstaða.
Drift EA er hreyfiafl, nýsköpunarsetur og miðstöð frumkvöðla og nýsköpunar, staðsett í hjarta Akureyrar. Drift býður upp á stuðning og þjónustu við frumkvöðla í formi fjármögnunar, aðstöðu og þekkingar. Hjá Drift geta frumkvöðlar og nýsköpunarfyrirtæki sótt um að komast í svokallaðan Hlunn (Incubator) og fengið stuðning til að þróa, prófa og vinna áfram að hugmyndinni. Drift leggur áherslu á matvælaframleiðslu, heilbrigðislausnir, lífefnaiðnað, hugbúnað fyrir sjávarútveg og grænar lausnir.
Kistan er atvinnu- og nýsköpunarsetur Langanesbyggðar. Markmið þess er að skapa samfélag stofnana, fyrirtækja og frumkvöðla undir einu þaki til að styðja við atvinnuþróun og nýsköpun. Kistan er staðsett í Kistufelli sem eitt sinn hýsti Sparisjóð Þórshafnar og nágrennis, en þar má nú finna opið vinnurými og fundaraðstöðu.
Fab Lab
Fab Lab er stafræn smiðja með það að markmiði að efla nýsköpun og tæknilæsi í samfélaginu. Þar er hægt að þróa nýsköpunarhugmyndir meðal almennings, innan menntastofnana og í atvinnulífinu. Ýmiss búnaður er til staðar m.a. laserskeri, þrívíddarprentari, stafrænir fræsarar, stafræn útsaumavél, vínylskeri, hitapressari og litaprentari fyrir textíl.
Fab Lab er stafræn smiðja með það að markmiði að efla nýsköpun og tæknilæsi í samfélaginu. Þar er hægt að þróa nýsköpunarhugmyndir meðal almennings, innan menntastofnana og í atvinnulífinu.
Styrkir
Uppbyggingasjóður styrkir m.a. nýsköpunarverkefni á Norðurlandi eystra í samræmi við samning um sóknaráætlun landshlutans. Að jafnaði getur styrkur numið allt að 50% af heildarkostnaði verkefnis.
Annað
Tveggja daga hugmyndasmiðja þar sem unnið er að lausnum sem tengjast nýtingu hráefnis sem fellur til á Húsavík. Fyrirtæki á svæðinu kynna áskoranir sínar í þeim efnum og fyrirlesarar fræða okkur um aðferðir sem nýtast við þróun og framsetningu nýsköpunarhugmynda. Vegleg verðlaun í boði.
